Jos 11 | NdeIBE | STEP | Kwathi uJabhini inkosi yeHazori isizwa lokhu yathumela ilizwi kuJobabi inkosi yeMadoni lasemakhosini eShimironi le-Akhafi,

Joshua 11

Amakhosi asenyakatho ayehlulwa

1 Kwathi uJabhini inkosi yeHazori isizwa lokhu yathumela ilizwi kuJobabi inkosi yeMadoni lasemakhosini eShimironi le-Akhafi,

2 lasemakhosini enyakatho ayesezintabeni e-Arabha eningizimu yeKhinerethi emawatheni amaqaqa entshonalanga kanye laseNafothi Dori entshonalanga; 3 lakuma-Khenani empumalanga lentshonalanga; lakuma-Amori, amaHithi, amaPherizi lamaJebusi elizweni elilamaqaqa; kanye lakumaHivi ngaphansi kweHemoni esabelweni seMizipha. 4 Baphuma lamabutho abo wonke lenani elikhulu lamabhiza lezinqola – ibutho elikhulu, elikhulu okulingana letshebetshebe lokhunjini lolwandle. 5 Wonke la amakhosi abambana asesakha izihonqo ndawonye eManzini aseMeromi, ukulwa labako-Israyeli.

6 UJehova wathi kuJoshuwa, “Ungabesabi, ngoba ngalesi sikhathi kusasa ngizabanikela bonke kuba-Israyeli, sebefile. Uzaquma imisipha yamabhiza abo utshise izihonqo zabo.”

7 Ngakho uJoshuwa lebutho lakhe lonke bahlangana labo mathupha eManzini eMeromi wasebahlasela, 8 uJehova wabanikela esandleni sika-Israyeli. Babanqoba baxotshana labo baze babafikisa eSidoni Enkulu kusiya eMisirefothi Mayimi, leSigodini seMizipha empumalanga kwaze kwasala kungelamuntu ophilayo.

9 UJoshuwa wenza kibo lokho ayekulaywe nguJehova: Waquma imisipha yamabhiza abo njalo watshisa izinqola zabo.

10 Ngaleso sikhathi uJoshuwa waphenduka wabuyela emuva wathumba iHazori wasehlasela inkosi yakuleyo ndawo ngenkemba. (IHazori yayiyisigodlo sayo yonke imibuso leyo.) 11 Wonke umuntu owayephakathi kwayo wabhujiswa ngenkemba. Bababhubhisa baphela, abaze batshiya lutho oluphefumulayo, watshisa iHazori ngokwayo.

12 UJoshuwa wathumba wonke amadolobho esikhosini lamakhosi awo wawahlasela ngenkemba. Wawabhubhisa wonke, njengokulaya kukaMosi inceku kaJehova.

13 Kukanti-ke u-Israyeli kazange atshise loba yiwaphi amadolobho ayakhelwe emadundulwini – ngaphandle kweHazori, eyatshiswa nguJoshuwa.

14 Abako-Israyeli bathatha zaba ngezabo zonke izimpahla ababezithumbile okwakugoqela izifuyo zala amadolobho bahamba lakho kodwa bonke abantu bababhubhisa ngenkemba baphela bathi du, bengatshiyi lutho oluphefumulayo. 15 Njengoba uJehova walaya inceku yakhe uMosi, uMosi laye walaya uJoshuwa, uJoshuwa wakwenza lokho: katshiyanga lutho lungenziwanga ezintweni zonke uJehova owazilaya uMosi.

16 Ngakho uJoshuwa wathatha ilizwe lonke: ilizwe lamaqaqa, yonke iNegebi, isabelo sonke seGosheni, amawatha asentshonalanga, i-Arabha, lezintaba zako-Israyeli lamawatha azo,

17 kusukela entabeni yeHalaki, ephakama ngokuya eSeyiri, kusiya eBhali Gadi esiGodini seLebhanoni ngaphansi kwentaba iHemoni. Wathumba wonke amakhosi awo wawehlula wawabulala. 18 UJoshuwa walwa impi lawo wonke amakhosi okwesikhathi eside.

19 Ngaphandle kwamaHivi ayehlala eGibheyoni, kalikho idolobho loba elilodwa elenza isivumelwano sokuthula labako-Israyeli, abawathumbayo wonke empini. 20 Ngoba kwakunguJehova owenza izinhliziyo zawo zaba lukhuni zafuna ukulwa impi lo-Israyeli, ukwenzela ukuthi enelise ukubachitha baphele, ebabhubhisa okungelazwelo, njengokulaywa kukaMosi nguJehova.

21 Ngaleso sikhathi uJoshuwa waphuma wawabhubhisa ama-Anakhi elizweni lamaqaqa: kusukela eHebhroni, eDebhiri le-Anabi, kusukela elizweni lonke lamaqaqa lako-Israyeli. UJoshuwa wabhubhisa wababhuqa bona kanye lamadolobho abo.

22 Akula ma-Anaki asala esabelweni sabako-Israyeli; ngaphandle kweGaza iGathi le-Ashdodi lapho okwasila abanye bakhona.

23 Ngakho uJoshuwa wathumba ilizwe lonke, njengoba uJehova walaya uMosi, waselinika abako-Israyeli, njengelifa kusiya ngokwahlukaniswa kwezizwana zabo. Ngakhoke ilizwe laphumula ekulweni izimpi.